בלומינג גראוו שטימע - שמיני (החודש) תשפ״ד

ווי שוין געמאלדן פון פאראויס, איז פארגעקומען די פארגאנגענע מיטוואך פרשת שמיני דער די. אי. סי. הירינג, ווי עס האבן זיך באטייליגט הונדערטער פערזאנען און ווי אויך האבן אויפגעטרעטן איבער 200 קאמענטירער, וועלכע האבן געלאזט הערן זייער מיינונגען און געדאנקען במשך פינף לאנגע שטונדן וואס די הירינג האט גענומען, צוטיילט אין צוויי סעסיעס.

צווישן אלע קאמענטארן, האט זיך ארויסגעשטעלט דאס שיינקייט פון אחינו בני ישראל וואס זענען ארויסגעקומען און אפגעגעבן זייערע קאמענטארן מיט רעספעקט און פראפעסיאנאליזם לטובת דעם פראיעקט. ותשואת חן חן להם פארן אראפנעמען פון זייער טייערע צייט און זיך באטייליגן.

עס האבן אויך אויפגעטרעטן דער וועטעראן עסקן הרה״ח מו״ה משה דוד נידערמאן שליט״א, דער דירעקטאר פון יו. דזשעי. או. מיט גאר טרעפליכע ווערטער בנוגע דעם פראיעקט און ווי אויך הרה״ח מו״ה אהרן בנציון ווידער שליט״א, דער ראקלענד קאונטי לעגיסלעיטאר פאר דיסטריקט 13 פון מאנסי, וואס טוט איצטערט לויפן פאר ניו יארק סטעיט אסעמבלי, וועלכע האט אויך אויפגעטרעטן מיט גאר שטארקע דיבורים לטובת דעם פראיעקט.

ביידע האבן גאר שיין ארויסגעברענגט די טיפע העצע אין די גאס אנטקעגן דעם פראיעקט וואס איז נישט באזירט אויף קיין תכלית און פאקטן, און נאר אויף די "פן ירבה" שרעק, און זיי האבן געפאדערט אז דער די. אי. סי. זאל באהאנדלען דעם אפליקאציע קוקנדיג אויפ׳ן תוכן און דער פאקטישער מציאות, און נישט ווערן פארבלענדט פון פאליטישע אגענדעס און העצע פון דרויסנדיגע אינטערעסן, וואס האבן נישט מיט די פראיעקט זעלבסט.

עס איז געווען ספעציעל איבעראשענד צו זעהן ווי פון צווישן הונדערטער קאמענטירער האט נאר א מספר מיעוט געהאט אן אמת׳ע פארשטאנד אין דעם תוכן פון די אפליקאציע פאר די פערמיט וואס ווערט באהאנדלט. עס האט זיך ארויסגעשיילט זייער קלאר אז רובא דרובא וואס זענען געקומען קאמענטירן האבן בכלל נישט גענומען די צייט און מיה דורכצוקוקן און צו פארשטיין וואס דער נושא איז בכלל, נישט וויסנדיג קיין שום פאקטישער ציפערן צום ביישפיל וויפל וואסער איז פארהאן אין די 6 פון 26 קוועלער אויף וואס דער פערמיט איז באזירט פונעם פראיעקט.

ווי אויך האט זיך ארויסגעשטעלט אז די אנגענומענע מיינונג ביים פובליקום איז אז דער דיון איז צו זאל דער דעוועלאפמענט ארויסלאזן רויע סועזדש אין דעם סעטערלי קריק, וואס איז הימל שרייענד נאאיוו, ווען דער פערמיט איז איבער א סוער פלענט וואס וועט ארויסלאזן שוין טריעטעד וואסער וואס לויט די שטודיעס וועט עס זיין מער ריין פון די איצטיגע וואסער אין דעם קריק.

די פראפעסיאנאלן און אדוואקאטן וואס זענען געווען אנוועזנד, האבן אויסגעדרוקט שאק ווי די באטייליגטע זענען בכלל נישט באהאווענט אין אפלערנען דעם ענין און מען טוט בלויז ציען מסקנות, באזירט אויף נארישע פאליטישע העצע פון אינדרויסן.

און דערצו זענען געווען געוויסע וואס ניטאמאל דאס האבן זיי געקענט, נאר האבן אויסגענוצט דעם צוויי מינוט קאמענט פעריאד פאר קינדערישע אטאקעס אויף אינדיווידועלן, וואס האט געגעבן דעם ריכטיגן איינדרוק פאר דער די. א. סי. איבער דעם אמת'ן ציל.

דער די. אי. סי. האט געמאלדן, אז אנשטאט פארמאכן דעם ״קאמענט פעריאד״ אום אפריל 5, ווי פריער באשטימט, וועלן זיי עס אפשטופן מיט א וואך און עס פארמאכן ערשט אפריל 12, צו געבן נאך צייט פאר ווער עס וויל אריינשיקן נאך קאמענטארן.

נאך דעם אפריל 12 דאטום, האט דער די. אי. סי. זעכציג טאג צו געבן אן ״אפראוועל״ אדער א ״דינייעל״ פאר׳ן פראיעקט.

לב מלכים ושרים ביד השם, דער ציבור קוקט ארויס און ווארט אויף א פאזיטיווע אנטוויקלונג בנוגע דעם פראיעקט, ובשם השם נעשה ונצליח!

מיר וועלן האלטן דעם עולם אינפארמירט מיט ווייטערדיגע אפדעיטס.

מיר ווילן מודיע זיין אלע חשוב׳ע איינוואוינער, אז בעזהשי״ת דעם קומענדיגן מאנטאג פרשת מצורע וועט דער ״שמות טראק״ זיין ביי די יו. דזשעי. סי. הויפטקווארטיר אויף 29 מעריוואלד לעין סאוט, פון 6 אזייגער נאכמיטאג ביז 10 אזייגער ביינאכט.

מען וועט קענען נוצן די קיופאנס און דיסקאונטס פון ביידע קהילות ביים טראק.

הצלחה וברכה
חג כשר ושמח

ווי פאר אלעמען באקאנט, ציהט זיך שוין א לאנג-יעריגע געריכט איבער וואס די וואשינגטאנוויל סקול דיסטריקט טוט דיסקרימינירן די איינוואוינער דאהי פון זייער ערליך פארדינטע און שטייער באצאלטע טראנספארטאציע סערוויסעס.

די קעיס איז איבער די 21 טעג, ווען די מוסדות זענען אפן, אבער די סקול דיסטריקט איז פארמאכט, א שטייגער ווי חגאות. די טראנספארטאציע פאר די טעג האט אפילו נישט קיין איבריגע קאסטן פאר די סקול דיסטריקט, וויבאלד עס ווערט באלאנסירט מיט די טעג וואס די מוסדות זענען נישט אפן, א שטייגער ווי להבדיל די ימים טובים.

די סקול דיסטריקט טוט זיך שלאגן מיט ציין און נעגל נישט צו דארפן באצאלן פאר די 21 טעג, וואס דאס טוט דורכדעם אפקאסטן פאר די היגע איינוואוינער אחינו בני ישראל, הונדערטער טויזנטער דאללער קאלעקטיוו, פער יאר.

ברוך השם, דער געריכט גייט אין די גוטע דירעקציע און די קעיס איז געווארן אנגענומען ביים העכסטן אפעלאט געריכט, וועלכע איז דער פערטער סירקויט אוו אפיעלס אין ניו יארק סטעיט.

אצינד, ווי דער קעיס איז ערווארטעט געהערט צו ווערן אין די נאנטע וואכן, זענען די יו. דזשעי. סי. עסקנים ארויס מיט א ביטע צו די מוסדות התורה אין קרית יואל, אז זיי זאלן אריינשיקן צום העכסטן אפעלאט געריכט חיזוק און הערצה בריוון און ווי אויך לעגאלע מיינונגען און רעקאמענדאציעס, וועלכע רופט זיך אן "אמיקוס בריעף", לטובתינו.

הר״ר משה אלי׳ עסטרייכער שליט"א, דער אדמיניסטראטאר פון מוסדות ויואל משה, ואתו עמו הר״ר שלמה זלמן ווייס שליט"א דער אדמיניסטראטאר פון מוסדות תורה ויראה וואס שטייען אונז אייביג צו הילף, סיי ווען עס איז געקומען לגבי טראנספארטאציע און סיי ביי אנדערע מצבים, האבן אויף זייערע קאסטן אראנדזשירט דעם גאר מאכטפולן אדוואקאטן פירמע וואס שטייט שטענדיג צום דינסט פאר ביידע מוסדות, און שפיץ פונעם באקאנטן אדוואקאט מיסטער ריטשארד מעהאן, ווי יעדער געדענקט נאך איז ער געווען גאר אינסטרומענטאל ביי די קאוויד עפאכע, אז מען זאל קענען צוריק עפענען די מוסדות התורה ווי אמשנעלסטן דאהי אין אראנזש קאונטי.

מר. מעהאן מיט זיין היסטאריע און פארשטאנד בנוגע מוסדותינו הקדושים האט אפגעשריבן א דעטאלירטן און מאכטפולן "ליגעל אפיניען" צום אפעלאט געריכט לטובתינו, און עס איז געפיילט געווארן דעם יעצטיגן מיטוואך שמיני בשעה טובה ומוצלחת.

באזונדער איז אריינגעשיקט געווארן אן "אמיקוס בריעף" דורך אגודת ישראל ד'אמעריקע וואס טוט מיטהאלטן פונדערנאנט אלע אקטיוויטעטן דאהי, ווי זיי האבן שוין פיל ארויסגעהאלפן דעם ציבור מיטן ארלעדיגן דעם טעקס וועטא פונעם גאווערנאר אינעם עבר, און וויבאלד דער אויסגאנג פון דעם קעיס קען בעזרת השם יתברך האבן גאר גונסטיגע רעזולטאטן פאר די הונדערטער מוסדות התורה איבער גרעיטאר ניו יארק ווי זיי פארטרעטן א גרויסן ציבור תלמידים, האבן זיי אויך אנטייל גענומען אצינד שכם אחד לטובת הענין.

דער קעיס איז אויפן קאלענדער געהערט צו ווערן אום מאי 15 למספרם ובשעה טובה ומוצלחת.

וחפץ השם בידינו יצליח, ובשם השם נעשה ונצליח, ותשואת חן חן להם!

"אמיקוס בריעף" פון מוסדות התורה אין קרית יואל

"אמיקוס בריעף" פון אגודת ישראל ד׳אמעריקע