בלומינג גראוו שטימע - אמור תשפ״ד

דעם פארגאנגענעם מיטוואך, איז פארגעקומען דער פארהער ביי די פערטע אפעלאט געריכט אין אלבאני, וועלכע איז די העכסטע אפעלאט געריכט אין ניו יארק סטעיט, בנוגע די אנגייענדע קעיס צווישן די יו. דזשעי. סי. און די וואשינגטאנוויל סקול דיסטריקט איבער די צוואנציג טעג פון חגאות וואס די מוסדות התורה זענען אפן און די וואשינגטאנוויל סקול דיסטריקט שטעלט נישט צו קיין טראנספארטאציע.

עס האבן אויפגעטרעטן דער באגאבטער אדוואקאט וואס טוט פארטרעטן די יו. דזשעי. סי. אינטערעסן, ווי ער האט פארגעלייגט די טענות, און עס האבן אויפגעטרעטן אן אדוואקאט פון די ניו יארק סטעיט עדיוקעישאן דעפארטמענט, וועלכע האט פארגעלייגט די טענות פונעם סטעיט, און דאן האט אויפגעטרעטן דער אדוואקאט וואס פארטרעט די וואשינגטאנוויל סקול דיסטריקט מיט זייערע טענות דערקעגן.

דאן האט די געריכט געבעטן די יו. דזשעי. סי. אדוואקאט, צו אפענטפערן די טענות מצד די וואשינגטאנוויל סקול דיסטריקט און די סטעיט עדיוקעישאן דעפארטמענט און מיט דעם האט זיך די סעסיע געשלאסן.

די ריכטער האבן אויסגעפרעגט ביידע צדדים און עס איז געווען קענטליך אז זיי האבן זיך היפש פאראינטערסירט און דורכגעגאנגען די נושא גרונטליך.

עס איז ערווארטעט צו באקומען אן ענדגילטיגער באשלוס פונעם געריכט אין די קומענדיגע וואכן ביז ענדע יוני למספרם.

דער באשלוס וועט נישט קענען אפעלירט ווערן.

וזכות רבינו הקדוש זי"ע יגן בעדינו שחפץ ד' בידינו יצליח, ויוציא לאור דיננו למען צאן קדשין ותינוקות של בית רבן.

ובשם השם נעשה ונצליח!

דעם קומענדיגן דינסטאג, ולמס׳ מאי 21, קומט פאר די וואלן בנוגע די וואשינגטאנוויל סקול דיסטריקט בודזשעט, ווי די וואשינגטאנוויל סקול דיסטריקט טוט נאכאמאל העכערן דעם בודזשעט מיט 4.7 מיליאן דאלער, וואס דאס וועט זיין א העכערונג אין סקול-טעקס פון 3.27 פראצענט, פאר אלע איינוואוינער.

דאס קומט טראץ נאך וואס די לעצטע זעקס יאר האט די סקול דיסטריקט בכלל נישט צוגעלייגט קיין נייע סטודענטן צו זייער ענראולמענט, נאר פארקערט, זייער סטודענט ראַסטער שרינקט איין און גייט צוביסלעך אראפ.

עס איז וויכטיג אנצומערקן, אז מיט די היי יעריגע שטייער העכערונג, האלט מען שוין זינט תשע״ט ביי דרייסיג מיליאן דאלער קאלעקטיוו וואס די סקול דיסטריקט האט געהעכערט שטייערן פאר די איינוואוינער פונעם דיסטריקט.

עס איז אויך וויכטיג אנצומערקן, אז צו די זעלבע צייט, איז די מאנראו וואודבארי סקול דיסטריקט וועלכע האט דאפלט די סכום פון סטודענטן און זייער בודזשעט איז היפש ווינציגער פער סטודענט ווי וואשינגטאנוויל, און איז פיל בעסער באלאנסירט.

ווי אויך טוט דער מאנראו וואודבארי סקול דיסטריקט אינגאנצן הייבן דעם בודזשעט פונעם קומענדיגן סקול יאר מיט נאר 1.78 פראצענט, אין די צייט וואס די וואשינגטאנוויל סקול דיסטריקט טוט דאס הייבן מיט מער ווי דאפלט פראצענט פון זיי.

דאס אלעס קומט שוין נאכדעם וואס אחינו בני ישראל תושבי עירינו לאזן איבער א גרויסע סורפלאס אין די קאסע פון די סקול דיסטריקט ווען דער עולם באצאלט שטייער און טוט נישט ניצן רובא דרובא פון זייערע סערוויסעס, אויסער טראנספארטאציע. דאס איז אויך אין די זעלבע צייט וואס די סקול דיסטריקט זיצט אויף איבער דרייסיג מיליאן דאלער אין רעזערוו פאנדס אין די קאסע.