במשך דעם ווינטער האט די ווילעדזש דעפארטמענט אוו פובליק ווארקס פארראכטן און ערזעצט איבער צוואנציג פייער היידרענטס דורכאויס דעם ווילעדזש, וועלכע די אינערליכע רערן זענען געווען פאר'ראסטעט, צוברעקלט און אומנוצבאר, וואס דאס איז געווען א גרויסע סכנה און איז געווען א חלק פון די פארעלטערטע אפגענוצטע אינפראסטרוקטור וואס גייט שוין צוריק לאנגע יארן.

ברוך השם, ווי מען שטייט יעצט, טוען אלע פייער היידרענטס אינעם ווילעדזש פולשטענדיג פונקציאנירן און בעזהשי״ת האפן מיר בקרוב צו קענען האבן א פולקאמע "פייער רעיטעד PSI פרעשור" אין די וואסער ליניעס ווי נאר עס וועט געבויעט ווערן דער גיגאנטישער וואסער טאנק אויף פארט ווארט, אויף וואס די ווילעדזש האט באקומען די גרענט דעם פארגאנגענעם יאר.

די ארבעט איז ערווארטעט זיך אנצוהייבן דעם זומער, דער טאנק וועט זיין אויפגעהויבן 70 פיס אין דער הייעך און וועט אנטהאלטן א האלב מיליאן גאלאן וואסער, וואס וועט פרעשוריזירן אלע וואסער ליניעס, און דאן וועלן די פייער היידרענטס ווערן קוואליפיצירט אלס "פייער-רעיטעד" מיט גענוג פרעשור צו באקעמפן פייערן, על כל צרה שלא תבוא.

דער ווילעזדש באדאנקט זיך פאר די קאאפעראציע פון תושבי העיר בשעת די פאררעכטונג ארבעט, וואס דורכאויס האט מען געמוזט אפשפארן די וואסער פלוס אין געוויסע געגענטער וואס האט געשאפן אומאנגענעמליכקייטן אבער דער ציבור האט מיטגעארבעט מיט געדולד און פארשטענדעניש צו העלפן דעם פראיעקט פראגרעסירן פאראויס.